Development

Development in Cambodia

យន្តការ​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ខែសីហា 14, 2009

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 10:28 ព្រឹក

អង្គភាព​រដ្ឋបាល​មូលដ្ឋាន​ខេត្ត ក្រុង​ដែល​មាន​តួនាទី​ជា​ជំនួយការ​ឲ្យ​អភិបាល​ខេត្ត ក្រុង​ក្នុង​ការអនុវត្ត​ច្បាប់​ស្តី​ពី​ការគ្រប់គ្រង​រដ្ឋបាល​ឃុំ សង្កាត់ និង​គោលនយោបាយ​វិមជ្ឍការ​នៅ​ក្នុង​ខេត្ត ក្រុង​របស់​ខ្លួន​ មាន​តួនាទី​ និង​ភារកិច្ច​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ដូច​ខាង​ក្រោម​៖

  • សម្របសម្រួល​ និង​សហការ​ជាមួយ​មន្ទីរ​កិច្ចការ​នារី​ខេត្ត ក្រុង មន្ទីរ អង្គភាព និង​ភ្នាក់ងារ​ពាក់ព័ន្ធ​នានា ដើម្បិ​អប់រំ​បណ្តុះបណ្តាល និង​កសាង​សមត្ថភាព​ដល់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​
  • ទំនាក់​ទំនង និង​សហការ​ជាមួយ​នឹង​មន្ទីរ​អប់រំ យុវជន និង​កីឡា មន្ទីរ​សុខាភិបាល មន្ទីរ​អភិវឌ្ឍន៍​ជនបទ មន្ទីរ​កិច្ចការ​នារី មន្ទីរ​សង្គមកិច្ច​អតីតយុទ្ធជន និង​យុវនីតិសម្បទា ស្នងការដ្ឋាន​នគរបាល​ខេត្ត ក្រុង​និង​មន្ទីរ​វិស័យ​នានា​ក្នុង​ខេត្ត ក្រុង​ពាក់ព័ន្ធ​បញ្ហា និង​តម្រូវការ​របស់​នារី​និង​កុមារ​
  • ពង្រឹង​ទំនាក់ទំនង​រវាង​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ ជាមួយ​ក្រុម​ប្រឹក្សាឃុំ សង្កាត់ និង​ជាមួយ​អ្នក​ផ្តល់​សេវា​សង្គម​នានា និង​សហគមន៍​
  • ផ្សព្វផ្សាយ​អំពី​ច្បាប់ គោលនយោបាយ​នានា​របស់​រដ្ឋ​ពាក់ព័ន្ធ​នារី និង​កុមារ​ដល់​ក្រុមប្រឹក្សា​ឃុំ សង្កាត់ គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ និង​អ្នក​សម្របសម្រួល​ខេត្ត ក្រុង​ ស្រុក​ខណ្ឌ
  • ធានា​ថា អ្នក​សម្របសម្រួល​ខេត្ត​ ក្រុង ស្រុក ខណ្ឌ ចូល​រួម​គាំទ្រ និង​ផ្តល់​យោបល់​ដក់​ក្រុម​ប្រឹក្សា​ឃុំ សង្កាត់ និង​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ដើម្បី​លើក​កម្ពស់​ស្ថានភាព​សុខភាព អប់រំ កិច្ចការពារ និង​ការអភិវឌ្ឍ​កុមារ​តូច​ៗ
  • ធានា​ថា ក្រុម​ប្រឹក្សា​ឃុំ សង្កាត់​ដាក់​បញ្ចូល​បញ្ហា​នារី និង​កុមារ​ទៅ​ក្នុង​របៀប​វារៈ​នៃ​កិច្ច​ប្រជុំ​ និង​បញ្ចូល​ក្នុង​របាយការណ៍​របស់​ខ្លួន
  • តាម​ដាន ត្រួត​ពិនិត្យ និង​វាយ​តម្លៃ​នូវ​ការអនុវត្ត​ការងារ​របស់​គណៈកម្មាធិការ​
  • បូក​សរុប និង​រៀបចំ​របាយការណ៍​ដែល​ទាក់ទង​នឹង​ឃុំ សង្កាត់ ដោយ​មាន​បញ្ជាក់​ច្បាស់លាស់​អំពី​ស្ថានភាព​នារី និង​កុមារ​ឲ្យ​បាន​ទៀងទាត់​តាម​ការកំណត់​។

មន្ទីរ​កិច្ចការ​នារី​ខេត្ត ក្រុង​នឹង​ចូល​រួម​ជួយ​កសាង​សមត្ថភាព​អ្នក​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ អំពី​ទស្សនទាន​យេនឌ័រ ការបញ្រ្ជាប​យេនឌ័រ និង​ការជម្រុញ​ឲ្យ​មាន​សមភាព​យេនឌ័រ​នៅ​ក្នុង​ឃុំ សង្កាត់​។

មន្ទីរ​អប់រំ យុវជន និង​កីឡា​ខេត្ត ក្រុង​នឹង​ជួយ​ផ្តល់​ការគាំទ្រ​ផ្នែក​បច្ចេកទេស​ដល់​នាយកសាលា ឬ​តំណាង​សាលា​ដែល​ជា​សមាជិក​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ក្នុង​ការអនុវត្ត​មុខងារ​ឲ្យ​មាន​ប្រសិទ្ធភាព​។

មន្ទីរ​សុខាភិបាល​ខេត្ត ក្រុង​នឹង​ជួយ​ផ្តល់​ការគាំទ្រ​ផ្នែក​បច្ចេកទេស​ដល់​ប្រធាន ឬ​តំណាង​មណ្ឌល​សុខភាព​ក្នុង​ឃុំ សង្កាត់ និង​មណ្ឌល​សុខភាព​ពាក់ព័ន្ធ​ដែល​ជា​សមាជិក​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ក្នុង​ការអនុវត្ត​មុខងារ​ឲ្យ​មាន​ប្រសិទ្ធភាព​។

ស្នងការ​នគរបាល​ខេត្ត ក្រុង​នឹង​ជួយ​ផ្តល់​ការគាំទ្រ​ផ្នែក​បច្ចេកទេស​ដល់​ប្រធាន ឬ​តំណាង​ប៉ុស្តិ៍​រដ្ឋបាល​ឃុំ សង្កាត់ ដែល​ជាសមាជិក​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ក្នុង​ការអនុវត្ត​មុខងារ​ឲ្យ​មាន​ប្រសិទ្ធភាព​។

សាលាស្រុក​ ខណ្ឌ​មាន​តួនាទី និង​ភារកិច្ច​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ក្នុង​ការអនុវត្ត​តួនាទី និង​ភារកិច្ច​របស់​ខ្លួន​ឲ្យ​បាន​ល្អ​ប្រសើរ​។ តួនាទី និង​ភារកិច្ច​ចម្បង​របស់​ស្រុក ខណ្ឌ គឺ​ការសម្របសម្រួល​កិច្ច​ប្រជុំ​ប្រចាំ​ត្រីមាស​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ក្នុង​ស្រុក ខណ្ឌ​របស់​ខ្លួន​។

ការប្រជុំ​ប្រចាំ​ត្រីមាស​នៅ​ថ្នាក់​ស្រុក ខណ្ឌ​៖

ក). គោលបំណង៖ កិច្ចប្រជុំ​ប្រចាំ​ត្រី​មាស​នេះ មាន​គោលបំណង​ដើម្បី​ពិនិត្យ​មើល​អំពី​ការអនុវត្ត​តួនាទី និង​ភារកិច្ច​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ និង​ផ្តល់​ការគាំទ្រ​នានា​។

ខ). អ្នក​ចូលរួម​៖ អ្នក​ចូល​រួម​ប្រជុំ​ប្រចាំ​ត្រី​មាស​នេះ រួម​មាន​៖

  • អភិបាល​ស្រុក ខណ្ឌ
  • ប្រធាន ឬ​មន្ត្រី​អង្គភាព​រដ្ឋបាល​មូលដ្ឋាន​ខេត្ត ក្រុង
  • ប្រធាន ឬ​តំណាង​ការិយាល័យ​កិច្ចការ​នារី​ស្រុក ខណ្ឌ
  • ប្រធាន​គណៈកម្មាធិការ​ទទួល​កិច្ចការ​នារី និង​កុមារ​ឃុំ​ សង្កាត់
  • សមាជិក​អចិន្ត្រៃយ៍​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់
  • ប្រធាន ឬ​តំណាង​ការិយាល័យ​ពាក់ព័ន្ធ​នានា​នៅ​ក្នុង​ស្រុក ខណ្ឌ

គ). ប្រធាន​អង្គប្រជុំ​៖ អភិបាល​ស្រុក ខណ្ឌ គឺ​ជា​ប្រធាន​អង្គប្រជុំ​ប្រចាំ​ត្រីមាស​នេះ​។

ឃ). អ្នក​កត់ត្រា​៖ ប្រធាន​អង្គប្រជុំ​ជ្រើសរើស​អ្នក​ចូលរួម​ប្រជុំ​ណា​ម្នាក់ ជា​អ្នក​កត់ត្រា​។

ង). រយៈពេល​៖ មួយ​ព្រឹក ឬ​មួយ​ល្ងាច (កន្លះ​ថ្ងៃ)

ច). របៀប​វារៈ ការប្រជុំ​ប្រចាំ​ត្រី​មាស​នេះ ត្រូវ​ផ្តោ​លើ​របៀប​វារៈ​មួយ​ចំនួន​ដូច​ខាង​ក្រោម​៖

  • ពិនិត្យ​មើល​កំណត់​ហេតុ​ប្រជុំ​លើក​មុន
  • រាយការណ៍ និង​ពិភាក្សា​លើ​ការអនុវត្ត​តួនាទី និង ភារកិច្ច​របស់​ គ.ក.ន.ក ប្រចាំ​ឃុំ សង្កាត់​នីមួយ​ៗ និង​បញ្ហា​ចម្បង​ៗ​ដែល​តម្រូវ​ឲ្យ​មាន​ការគាំទ្រ​និង​អន្តរាគមន៍​ពី​ថ្នាក់​ស្រុក ខណ្ឌ និង​ថ្នាក់​ខេត្ត ក្រុង
  • ផ្សព្វផ្សាយ​អំពី​គោលការណ៍​ណែនាំ ឬ​នីតិវិធី​ពាក់ព័ន្ធ​នឹ​ការអនុវត្ត​តួនាទី​និង​ភារកិច្ច​របស់ គ.ក.ន​.ក (បើ​មាន)
  • បូក​សរុប​អំពី​ចំណុច​សំខាន់​ៗ​ដែល​បាន​ឯកភាព និង​រៀបចំផែនការ​សកម្មភាព​សម្រាប់​អនុវត្ត​បន្ត​
  • ផ្សេង​ៗ​។

ឆ). ដំណើរការ​ប្រជុំ

  • ប្រធាន​អង្គប្រជុំ​ពិនិត្យ​កំណត់​ហេតុ​ប្រជុំ​លើក​មុន​ម្តង​មួយ​ចំណុច​ៗ
  • ប្រធាន​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​រាយការណ៍​អំពី​ការរីក​ចម្រើន​នៃ​ការអនុវត្ត​តួនាទី និង​ភារកិច្ច​របស់​គណៈកម្មាធិការ​របស់​ខ្លួន​
  • ផ្សព្វផ្សាយ​អំពី​គោលការណ៍​ណែនាំ ឬ​នីតិវិធី​ពាក់ព័ន្ធ​នឹ​ងការអនុវត្ត​តួនាទី​ និង​ភារកិច្ច​របស់​គណៈកម្មាធការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ (បើ​មាន)
  • ប្រធាន​អង្គប្រជុំ​ដឹកនាំ​ការពិភាក្សា សង្ខេប​ឡើង​វិញ​នូវ​ចំណុច​ដែល​បាន​ឯកភាព​គ្នា និង​រៀបចំ​ផែនការ​សកម្មភាព​សម្រាប់​អនុវត្ត​បន្ត​។

ការចំណាយ​ក្នុង​ការប្រជុំ​ប្រចាំ​ត្រីមាស​របស់​គណៈកម្មាធិការ​ទទួល​បន្ទុក​កិច្ចការនារី និង​កុមារ​​ឃុំ សង្កាត់​នៅ​ថ្នាក់​ស្រុក​ ខណ្ឌ ត្រូវ​ប្រើប្រាស់​ថវិកា​របស់​គណៈកម្មាធិការ​ប្រិបត្តិ​នៃ​គណៈកម្មាធិការ​អភិវឌ្ឍន៍​បទ​ខេត្ត ក្រុង នៅ​ក្នុង​ផ្នែក​រដ្ឋបាល​មូលដ្ឋាន​។ នៅ​ឆ្នាំ ២០០៨ ស្រុក​ ខណ្ឌ​នីមួយ​ៗ​នឹង​មាន​ថវិកា​ចំនួន ៣០០ ដុល្លារ សម្រាប់​ចំណាយ​ទៅ​លើ​ការរៀបចំ​ប្រជុំ​ប្រចាំ​ត្រីមាស​របស់​គណៈកម្មាធិការ​ទទួល​បន្ទុក​កិច្ចការនារី និង​កុមារ​ឃុំ សង្កាត់​នៅ​ថ្នាក់​ស្រុក​ ខណ្ឌ​ដូច​ជា​៖

  • អាហារ​សម្រន់ (០.៥​ ដុល្លារ/នាក់/ថ្ងៃ)
  • សម្ភារៈ​សម្រាប់​ប្រើប្រាស់​ក្នុង​កិច្ចប្រជុំ
  • ថត​ចម្លង​ឯកសារ​នានា​។
បញ្ជាក់ៈ ថ្លៃ​ធ្វើ​ដំណើរ និង​ប្រាក់​បេសកកម្ម​របស់​អ្នក​ចូលរួម​ប្រជុំ គឺ​ជា​បន្ទុក​ផ្ទាល់​របស់​អង្គភាព​សាមី​។

ប្រភព​៖

- ការអនុវត្ត​មុខងារ​របស់​គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់

- THE FUNCTIONING OF COMMUNE COMITTEE FOR WOMEN AND CHILDREN

 

ការអនុវត្តការងារ​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ខែសីហា 13, 2009

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 10:42 ព្រឹក

គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ត្រូវ​អនុវត្ត​របៀប​របប​ប្រជុំ​ការងារ​របស់​ខ្លួន ដូច​មាន​ចែង​ក្នុង​បទ​បញ្ជា​ផ្ទៃ​ក្នុង​របស់​ក្រុម​ប្រឹក្សា​ឃុំ សង្កាត់ ត្រង់​ជំពូក ៩ ដែល​ចែង​អំពី​គណៈ​កម្មាធិការ​ជំនួយ​ការ​របស់​ឃុំ សង្កាត់​។ ផ្អែក​តាម​របៀប​របប​ប្រជុំ​ការងារ គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ត្រូវ​រៀបចំ​កិច្ច​ប្រជុំ​ប្រចាំ​ខែ ប្រចាំ​ត្រីមាស​និង​ប្រចាំ​ឆ្នាំ​របស់​ខ្លួន​ឲ្យ​បាន​ទៀងទាត់​។​ ក្រៅ​ពី​ការប្រជុំ​ជា​ទៀងទាត់ គណៈកម្មាធិការ​ក៏​អាច​រៀបចំ​ប្រជុំ​វិសាមញ្ញ​ទៅ​តាម​ស្ថានភាព​ជាក់ស្តែង​ផង​ដែរ​។

ក). គោលបំណងៈ គណៈកម្មាធិការ​ត្រូវ​រៀបចំ​ប្រជុំ​ប្រចាំ​ខែ​របស់​ខ្លួន ដើម្បី​ពិនិត្យ​អំពី​ភាព​រីក​ចម្រើន និង​ដោះ​ស្រាយ​បញ្ហា​នានា​ពាក់ព័ន្ធ​នឹង​នារី និង​កុមារ​នៅ​ក្នុង​ឃុំ សង្កាត់​​។

ខ). អ្នក​ចូលរួមៈ សមាជិក​គណៈកម្មាធិការ​ដែល​ត្រូវ​អញ្ជើញ​ចូលរួម​ប្រជុំ​ប្រចាំ​ខែ​រួម​មាន​៖

  • ប្រធាន​គណៈកម្មាធិការ
  • អនុប្រធាន​គណៈកម្មាធិការ
  • សមាជិក​អចិន្ត្រៃយ៍​គណៈកម្មាធិការ
  • ស្មៀន​ឃុំ សង្កាត់
  • នាយ ឬ​នាយ​រង​ប៉ុស្តិ​នគរបាល​រដ្ឋបាល​ឃុំ សង្កាត់ ១ រូប
  • នាយក​សាលា​ ឬ​តំណាង​ ១ រូប មក​ពី​គ្រប់​សាលា​​ក្នុង​ឃុំ សង្កាត់ និង
  • ប្រធាន​មណ្ឌល​សុខភាព ឬ​តំណាង ១ រូប មក​ពី​គ្រប់​មណ្ឌល​សុខភាព​ដែល​ពាក់ព័ន្ធ​។

បើ​អាច​ធ្វើ​បាន ប្រធាន​គណៈកម្មាធិការ​អាច​អញ្ជើញ​មេ​ភូមិ ឬ​អនុប្រធាន​ភូមិ​ដែល​ជា​សមាជិក​គណៈកម្មាធិការ​ពី​គ្រប់​ភូមិ ដើម្បី​ចូល​រួម​ប្រជុំ​ប្រចាំ​ខែ​។

គ). ប្រធាន​អង្គ​ប្រជុំៈ ប្រធាន​ ឬ​ប្រធាន​ស្តី​ទី​របស់​គណៈ​កម្មាធិការ​។

ឃ). អ្នក​កត់ត្រាៈ ស្មៀន​ឃុំ សង្កាត់ ឬ​អ្នក​ទទួល​បន្ទុក​កិច្ចការ​នារី និ​កុមារ​ឃុំ សង្កាត់​។

ង). រយៈពេលៈ មួយ​ព្រឹក ឬ​មួយ​ល្ងាច (កន្លះ​ថ្ងៃ)

ច). របៀប​វារៈ រាល់​ការប្រជុំ​ប្រចាំ​ខែ​របស់​គណៈកម្មាធិការ​ត្រូវ​ផ្តោត​លើ​របៀប​វារៈ​មួយ​ចំនួន​ដូច​ខាង​ក្រោម​នេះ​៖

  • ពិនិត្យ​លើ​របាយការណ៍​ប្រជុំ​ខែ​មុន
  • រាយការណ៍ និង​ពិភាក្សា​អំពី​ផ្នែក​សេវា​សុខភាព
  • រាយការណ៍ និង​ពិភាក្សា​អំពី​ផ្នែក​អប់រំ
  • រាយការណ៍​ និង​ពិភាក្សា​អំពី​ការចុះ​បញ្ជី​កំណើត​នៅ​ក្នុង​ឃុំ សង្កាត់
  • រាយការណ៍ និង​ពិភាក្សា​អំពី​បញ្ហា​ចម្បង​ៗ​ពាក់ព័ន្ធ​នារី និង​កុមារ​នៅ​ក្នុង​ឃុំ សង្កាត់
  • រាយការណ៍ និង​ពិភាក្សា​អំពី​បញ្ហា​សន្តិសុខ និង​សណ្តាប់​ធ្នាប់​នៅ​ក្នុង​ឃុំ សង្កាត់
  • រាយការណ៍​អំពី​ការប្រើប្រាស់​ថវិកា​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់
  • ផ្សេង​ៗ​។

ឆ). ដំណើរការ​ប្រជុំៈ ការប្រជុំ​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ អាច​​ប្រព្រឹត្ត​តាម​សកម្មភាព​ដូច​ខាង​ក្រោម​៖

  • មេឃុំ ចៅ​សង្កាត់​ដែល​ជា​ប្រធាន​គណៈកម្មាធិការ​ទទួល​បន្ទុក​កិច្ចការ​នារី និង​​កុមារ​ឃុំ សង្កាត់​៖
    • មាន​មតិ​បើក​កិច្ច​ប្រចាំ​ខែ
    • ដែល​ឯកភាព​លកាល​ពី​ប្រជុំ​លើក​មុន និង​ពិនិត្យ​មើល​អំពី​ភាព​រីក​ចម្រើន
    • បញ្ជាក់​អំពី​បញ្ហា​ដែល​មិន​ទាន់​បាន​ដោះស្រាយ និង​ឯកភាព​លើ​ផែនការ​សកម្មភាព​បន្ត​។
  • ប្រធាន ឬ​តំណាង​មណ្ឌល​សុខភាព​នៅ​ក្នុង​ឃុំ សង្កាត់ និង​មណ្ឌល​សុខភាព​ពាក់ព័ន្ធ ដែល​ជា​សមាជិក​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ​ សង្កាត់ រាយការណ៍​អំពី​ព័ត៌មាន​ខាងក្រោម​នេះ ដោយ​ផ្អែក​តាម​របាយការណ៍​មណ្ឌល​សុខភាព​ប្រចាំ​ខែ​​៖
    • ចំនួន​ស្ត្រី​មាន​ផ្ទៃពោះ​សរុប​នៅ​ក្នុង​ឃុំ សង្កាត់
    • ចំនួន​ស្ត្រី​មាន​ផ្ទៃ​ពោះ​បាន​ទទួល​ការពិនិត្យ​ផ្ទៃពោះ
    • ចំនួន​ស្រ្តី​មាន​ផ្ទៃពោះ​សម្រាល​កូន​សរុប​នៅ​ក្នុង​ឃុំ សង្កាត់
    • ចំនួន​ស្រ្តី​មាន​ផ្ទៃពោះ​បាន​សម្រាល​កូន​ដោយ​ឆ្មប​ជំនាញ​​នៅ​កន្លែង​ផ្តល់​សេវា​សុខាភិបាល (មណ្ឌល​សុខភាព សម្ភព មន្ទីរ​ពេទ្យ)
    • ចំនួន​ស្ត្រី​មាន​ផ្ទៃពោះ​សម្រាល​កូន​ដោយ​ឆ្មប​ជំនាញ​នៅ​តាម​ផ្ទះ
    • ចំនួន​ស្ត្រី​មាន​ផ្ទៃពោះ​សម្រាល​កូន​ដោយ​ឆ្មប​បុរាណ​នៅ​តាម​ផ្ទះ
    • ចំនួន​ស្ត្រី​មាន​ផ្ទៃពោះ​ស្លាប់​ពេល​មាន​ផ្ទៃពោះ ពេល​សម្រាល និង​ក្រោយ​ពេល​សម្រាល
    • ចំនួន​កុមារ​អាយុ​ក្រោម​ ១ ឆ្នាំ សរុប​នៅ​ក្នុង​ឃុំ សង្កាត់
    • ចំនួន​កុមារ​អាយុ ១ ឆ្នាំ ទទួល​បានការចាក់​ថ្នាំ​បង្ការ​ជម្ងឺ​កញ្ជ្រិល
    • ចំនួន​កុមារ​អាយុ ៥ ឆ្នាំ​សរុប​​នៅ​ក្នុង​ឃុំ សង្កាត់
    • ចំនួន​កុមារ​អាយុ ៥ ឆ្នាំ​ទទួល​មរណៈភាព​ក្នុ​អំឡុង​ខែ​មុន
  • នាយក​សាលា ឬ​តំណាង​នាយក​សាលា​ទាំងអស់​នៅ​ក្នុង​ឃុំ សង្កាត់​ដែល​ជា​សមាជិក​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ រាយការណ៍​អំពីព័ត៌មាន​ខាង​ក្រោម​នេះ ដោយ​ផ្អែក​តាម​របាយការណ៍​​សាលារៀន​ប្រចាំ​ខែ​៖
    • ចំនួន​កុមារ​អាយុ ៦-១១ ឆ្នាំ​សរុប​នៅ​ក្នុង​ឃុំ សង្កាត់
    • ចំនួន​កុមារ​អាយុ ៦-១១​ ឆ្នាំ​ដែល​បាន​ចុះ​ឈ្មោះ​ចូល​រៀន​នៅ​សាលា​បឋម​សិក្សា
    • ចំនួន​កុមារ​អាយុ ៦-១១ ឆ្នាំ​អវត្តមាន​ពី​សាលារៀន​លើស​ពី​ ១៥ ថ្ងៃ​ជាប់​ៗ​គ្នា
    • ភាគរយ​កុមារ​អាយុ ៦-១១ ឆ្នាំ​អវត្តមាន​ពី​សាលារៀន​លើសពី ១៥ ថ្ងៃ​ជាប់​ៗ​គ្នា
  • ស្មៀន​ឃុំ សង្កាត់ រាយការណ៍​អំពី​ព័ត៌មាន​ខាង​ក្រោម​នេះ ដោយ​ផ្អែក​តាម​របាយការណ៍​ប្រចាំខែ​ស្តី​ពី​ការចុះ​អត្រា​នុកូលដ្ឋាន​កំណើត និង​ការអនុវត្ត​ថវិកា​របស់​គណៈកម្មាធិការ​៖
    • ចំនួន​ទារក​កើត​នៅ​ក្នុង​ឃុំ សង្កាត់​សរុប (គិត​ក្នុង​ខែ)
    • ចំនួន​ទារក​ដែល​បាន​ចុះ​បញ្ជី​កំណើត (គិត​ក្នុង​ខែ)
    • ភាគរយ​ចំនួន​ទារក​ដែល​បាន​ចុះ​បញ្ជី​កំណើត (គិត​ក្នុង​ខែ)
    • ការប្រើប្រាស់​មូលនិធិ​របស់ ក.ម.ក
  • អ្នក​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​រាយការណ៍​ព័ត៌មាន​អំពី​ព្រឹត្តិការណ៍ ឬ​សកម្មភាព​ចម្បង​ៗ​ពាក់ព័ន្ធ​នារី​និង​កុមារ នៅ​ក្នុង​ឃុំ សង្កាត់​ដូច​ជា ការផ្សព្វផ្សាយ ការបណ្តុះបណ្តាល ការរៀបចំ​វេទិាការ ការសិក្សា​វាយ​តម្លៃ​ជា​ដើម ដែល​ធ្វើ​ឡើង​នៅ​ក្នុង​ឃុំ សង្កាត់​។
  • នាយ​នគរបាល​ប៉ុស្តិ៍ ឬ​តំណាង​ដែល​ជា​សមាជិក​គណៈកម្មាធិការ​ទទួល​បន្ទុក​កិច្ចការ​នារី​និង​កុមារ​ឃុំ សង្កាត់ រាយការណ៍​ដោយ​ផ្អែក​តាម​របាយការណ៍​ប្រចាំ​ខែ​ស្តី​ពី​បញ្ហា​សន្តិសុខ និង​សណ្តាប់​ធ្នាប់​នៅ​ក្នុង​ឃុំ សង្កាត់​។ ព័ត៌មាន​ដែល​​ត្រូវ​បាន​រាយការណ៍​អាច​មាន​ដូច​ជា​៖
    • ករណី​ចោរកម្ម
    • សកម្មភាព​ក្រុម​ក្មេង​ពាល
    • អំពើ​ហិង្សា
    • គ្រោះថ្នាក់​ចរាចរ
    • ល្បែង​ស៊ីសង
    • ការឆបោក…។ល។
  • បន្ទាប់​ពី​ផ្នែក​ពាក់ព័ន្ធ​នីមួយ​ៗ​បាន​រាយការណ៍ និង​ពិភាក្សា​ចប់​សព្វគ្រប់ ប្រធាន​អង្គប្រជុំ​ត្រូវ​ផ្តល់​ឱកាសឲ្យ​អ្នក​ចូល​រួម​ទាំងអស់​លើក​ឡើង​អំពី​បញ្ហា​ផ្សេង​ៗ និង​បូក​សរុប​លទ្ធផល​នៃ​កិច្ចប្រជុំ និង​បញ្ជាក់​ឡើង​វិញ​អំពី​សកម្មភាព​ដែល​ត្រូវ​អនុវត្ត​។

កំណត់​សម្គាល់ៈ បន្ទាប់​ពី​ផ្នែក​នីមួយ​ៗ​រាយការណ៍​ចប់ ប្រធាន​អង្គប្រជុំ ត្រូវ​ដឹក​នាំ​ការពិភាក្សា​ដើម្បី​កំណត់​នូវ​ដំណោះ​ស្រាយ និង​រៀបចំ​ផែនការ​សកម្មភាព​សម្រាប់​អនុវត្ត​នូវ​ដំណោះស្រាយ​ដែល​បាន​កំណត់

ការប្រជុំ​ប្រចាំ​ឆាមាស និង​ប្រចាំ​ឆ្នាំ​៖

ក). គោលបំណងៈ គោលបំណង​នៃ​កិច្ច​ប្រជុំ​ប្រចាំ​ឆ្នាំ ឬ​ប្រចាំ​ឆមាស​ត្រូវ​បាន​ធ្វើ​ឡើង​ដើម្បី​ពិនិត្យ​ឡើង​វិញ​អំពី​៖

  • ការអនុវត្ត​មុខងារ និង​កិច្ចការ​របស់​សមាជិក​គណៈកម្មាធិការ
  • កម្រិត​ការឆ្លើយ​តប​ទៅ​នឹង​សូចនាករ​នៃ​ការផ្តល់​មូលនិធិ​គាំទ្រ
  • ការប្រើប្រាស់​មូលនិធិ​គាំទ្រ​។

ខ). អ្នក​ចូលរួមៈ សមាជិក​គណៈកម្មាធិការ​ទាំងអស់​ត្រូវ​ចូល​រួម​ប្រជុំ​ប្រចាំ​ឆមាស និង​ប្រចាំ​ឆ្នាំ​របស់​គណៈកម្មាធិការ​។

គ). ប្រធាន​អង្គប្រជុំៈ ប្រធាន​ ឬ​ប្រធាន​ស្តី​ទី​របស់​គណៈកម្មាធិការ​។

ឃ). អ្នក​កត់ត្រាៈ ស្មៀន​ឃុំ សង្កាត់ ឬ​អ្នក​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​។

ង). រយៈពេលៈ មួយ​ព្រឹក ឬ​មួយ​ល្ងាច (កន្លះ​ថ្ងៃ)

ច). របៀបវារៈ ការប្រជុំ​ប្រចាំ​ឆមាស និង​ប្រចាំ​ឆ្នាំ​របស់​គណៈកម្មាធិការ​ត្រូវ​ផ្តោត​លើ​របៀបវារៈ​មួយ​ចំនួន​ដូច​ខាង​ក្រោម​នេះ​៖

  • បូក​សរុប​លទ្ធផល​នៃ​ការអនុវត្ត ដោយ​ធៀប​ជាមួយ​សូចនាករ​ដែល​បាន​កំណត់
  • កំណត់​នូវ​ដំណោះស្រាយ​សមស្រប និង​រៀបចំ​ផែនការ​សកម្មភាព
  • ការអនុវត្ត​ថវិកា​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​។

គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​អាច​រៀបចំ​ប្រជុំ​វិសាមញ្ញ​ នៅ​ពេល​ណា​ក៏​បាន តាម​ការកោះ​អញ្ញើញ​របស​ប្រធាន​គណៈ​កម្មាធិការ​។ ចំពោះ​សមាជិក​ដែល​ត្រូវ​អញ្ជើញ​ចូល​រួម​ប្រជុំ​អាស្រ័យ​ទៅ​លើ​ការសម្រេច​របស់​ប្រធាន​។

ប្រភព​៖

- ការអនុវត្ត​មុខងារ​របស់​គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់

- THE FUNCTIONING OF COMMUNE COMITTEE FOR WOMEN AND CHILDREN

 

ការផ្តល់​មូលនិធិ​គាំទ្រ​​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 9:09 ព្រឹក

ក្នុង​ទិសដៅ​ជម្រុញ​ឲ្យ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​អនុវត្ត​មុខងារ​របស់​ខ្លួន ឲ្យ​បាន​ល្អ​ប្រសើរ​ស្រប​តាម​សេចក្តី​ណែនាំ​ក្រុមគាំទ្រ​កម្មវិធី គ.ជ.វ. វ និង​គម្រោង​គាំ​ទ្រ​ការអភិវឌ្ឍ​បែប​ប្រជាធិបតេយ្យ​តាម​រយៈ​វិមជ្ឍការ និង​វសហមជ្ឍការ បាន​ផ្តួច​ផ្តើម​រក​មូលនិធិ​បន្ថែម​សម្រាប់​គាំ​ទ្រ​ដល់​ការអនុវត្ត​មុខងារ​របស់​គណៈកម្មាធិការ នៅ​ក្នុង​ឃុំ សង្កាត់​ចំនួន ១.១៩៩ ដែល​មិន​ស្ថិត​នៅ​ក្នុង​ខេត្ ក្រុង​គោលដៅ​របស់​អង្គការ​យូនីសេហ្វ​។

គោលបំណង​នៃ​ការផ្តល់​មូលនិធិ​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ គឺ​ដើម្បី​៖

  • ធានា​ថា​ស្ត្រី​មាន​ផ្ទៃពោះ​បាន​ទទួល​ការពិនិត្យ​ផ្ទៃពោះ
  • ធានា​ថា​ស្ត្រី​មាន​ផ្ទៃពោះ​បាន​សម្រាល​កូន​ដោយ​ឆ្មប​ជំនាញ​នៅ​កន្លែង​ផ្តល់​សេវា​សុខាភិបាល (មណ្ឌល​សុខភាព សម្ភព មន្ទីរ​ពេទ្យ)
  • កាត់​បន្ថយ​អត្រា​មរណៈ​របស់​ស្ត្រី​មាន​ផ្ទៃពោះ ក្នុង​ពេល​មាន​ផ្ទៃពោះ ពេល​សម្រាល និង​ក្រោយ​ពេល​សម្រាល
  • ធានា​ថា​កុមារ​អាយុ​ក្រោម ១ ឆ្នាំ​ទទួល​បាន​ការចាក់​ថ្នាំ​បង្ការ​ជម្ងឺ​កញ្រ្ជិល​
  • កាត់បន្ថយ​អត្រា​មរណៈ​របស់​កុមារ​អាយុ​ក្រោម ៥ ឆ្នាំ
  • ធានា​ថា​ទារក​ទើប​កើត​បាន​ទទួល​សំបុត្រ​កំណើត​ក្នុង​រយៈពេល ៣០ ថ្ងៃ
  • ធានា​ថា​កុមារ​អាយុ ៦-១១ ឆ្នាំ​បាន​ចុះ​ឈ្មោះ​ចូល​រៀន​នៅ​សាលា​បឋម​សិក្សា
  • កាត់​បន្ថយ​អត្រា​កុមារ​អាយុ ៦-១១ ឆ្នាំ​អវត្តមាន​ពី​សាលារៀន​លើស​ពី ១៥ ថ្ងៃ​ជាប់​ៗ​គ្នា​
  • ដោះ​ស្រាយ​បញ្ហា​ពាក់​ព័ន្ធ​សន្តិសុខ និង​សណ្តាប់​ធ្នាប់​ដែល​ប៉ះពាល់​​ដល់​នារី និង​កុមារ​ក្នុង​ឃុំ សង្កាត់​។

ដើម្បី​ទទួល​បាន​មូលនិធិ​គាំទ្រ​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​នីមួយ​ៗ​ត្រូវ​បំពេញ​តាម​ល័ក្ខខ័ណ្ឌ​ដូច​ខាង​ក្រោម​៖

  • បង្កើត​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់
  • មាន​ឆន្ទៈ​ក្នុង​ការសម្រេចឲ្យ​បាន​នូវ​គោលបំណង​នៃ​ការផ្តល់​មូល​និធិ
  • មាន​ឆន្ទៈ​ក្នុង​ការផ្តល់​របាយការណ៍​រីក​ចម្រើន​ឲ្យ​បាន​ទៀងទាត់​ ដែល​របាយការណ៍​នោះ​ត្រូវ​ឆ្លើយ​តប​ទៅ​នឹង​សូចនាករ​ដែល​បាន​កំណត់​។

សូចនាករ​សម្រាប់​វាស់វែង​លើ​ប្រសិទ្ធភាព​នៃ​ការផ្តល់​មូលនិធិ​គាំទ្រ​ដល់​គណៈកម្មាធិការ​ទទួល​បន្ទុក​កិច្ចការ​នារី​និង​កុមារ​ឃុំ សង្កាត់ មាន​ដូច​ខាង​ក្រោម​៖

  • ស្ត្រី​មាន​ផ្តៃពោះ…….%​បាន​ទទួល​ការផ្ទៃពោះ
  • ស្ត្រី​មាន​ផ្ទៃពោះ…….%​បាន​សម្រាល​កូន​ដោយ​ពេទ្យ​ឆ្មប​នៅ​កន្លែង​ផ្តល់​សេវា​សុខាភិបាល (មណ្ឌល​​សុខភាព ឬ​មន្ទីរ​ពេទ្យ ឬ​សម្ភព)
  • កុមារ​អាយុ​ក្រោម ១ ឆ្នាំ……%​បាន​ទទួល​ថ្នាំ​បង្ការ​ជម្ងឺ​កញ្រ្ជិល
  • ទារក​ទើប​កើត……%​បាន​ទទួល​សំបុត្រ​កំណើត​ក្នុង​រយៈពេល​ ៣០ ថ្ងៃ
  • កុមារ​អាយុ ៦-១១ ឆ្នាំ…….% បាន​​ចុះ​ឈ្មោះ​ចូល​រៀន​នៅ​សាលា​បឋម​សិក្សា
  • កុមារ​អាយុ ៦-១១ ឆ្នាំ…….% អវត្តមាន​ពី​សាលារៀន​លើស​ពី ១៥ ថ្ងៃ​ជាប់​ៗ​គ្នា​។

គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​ត្រូវ​កំណត់​ចំនួន​ភាគរយ​នៃ​សូចនាករ​នីមួយ​ៗ ដែល​ខ្លួន​គិត​ថា​អាច​សម្រេច​បាន​ នៅ​ដំណាច់​ឆ្នាំ​នីមួយ​ៗ ដោយ​ផ្អែក​តាមស្ថានភាព​ជាក់​ស្តែង​នៃ​ឃុំ សង្កាត់​របស់​ខ្លួន​។

ឃុំ សង្កាត់​នីមួយៗ​ទទួល​បាន​ថវិកា​ចំនួន ២០០ ដុល្លារ​ស្មើ​ៗ​គ្នា​ក្នុង​ ១ ឆ្នាំ​សម្រាប់​គណៈកម្មាធិការ​អនុវត្ត​តួនាទី និង​ភារកិច្ច​របស់​ខ្លួន​។ ថវិកា​នេះ​បញ្ចូល​ទៅ​ក្នុង​ថវិកា​ឃុំ សង្កាត់​ត្រង់​លេខ​កូដ ៧៤.០២.២០ “ការចូល​រួម​ធនធាន​ពី​អង្គការ និង​សមាគម​អន្តរជាតិ​ផ្សេង​ៗ” ។ ថវិកា​នេះ​សម្រាប់​ឲ្យ​គណៈកម្មាធិការ​​ចំណាយ​ទៅ​លើ​៖

  • ចំណាយ​លើ​អាហារ​សម្រន់ និង​ការថត​ចម្លង​ឯកសារ​សម្រាប់​ការប្រជុំ​របស់​គណៈកម្មាធិការ
  • ចំណាយ​សម្រាប់​ថ្លៃ​ធ្វើ​ដំណើរ​របស់​សមាជិក​គណៈកម្មាធិការ​ចូល​រួម​ប្រជុំ​ប្រចាំ​ខែ​នៅ​សាលា​ឃុំ សង្កាត់ និង​ប្រជុំ​ត្រីមាស​នៅ​សលា​ស្រុក​ ខណ្ឌ
  • ចំណាយ​សម្រាប់​សម្ភារៈ​ការិយាល័យ​។

កូដ​ថវិកា

ប្រភេទ​ចំណាយ ឯកតា ចំនួន តម្លៃ/ឯកតា សរុប($)
៦១.០៧ រៀបចំ​ប្រជុំ​ទៀង​ទាត់ ប្រជុំ ១២ ៤៨
៦១.០៦ សម្ភារៈ​ការិយាល័យ ខែ ១២ ៤៨
៦១.០៤ ថ្លៃ​ធ្វើ​ដំណើរ រួម ១០៤ ១០៤
សរុប​រួម ២០០

នីតិ​វិធី​នៃ​ការចំណាយ​ថវិកា​ចំនួន ២០០ ដុល្លា​នេះ នឹង​ចំណាយ​តាម​រយៈ​បេឡា​បុរេ​ប្រទាន ដោយ​អនុវត្ត​តាម​នីតិវិធី ដែល​មាន​ចែង​នៅ​ក្នុង​សៀវភៅ​ណែ​នាំ​ស្តី​ពី​ប្រព័ន្ធ​គ្រប់គ្រង​ហិរញ្ញ​វត្ថុ​ឃុំ សង្កាត់​។

ថវិកា​ដែល​សល់​ពី​ការចំណាយ​នៃ​ឆ្នាំ​នីមួយ​ៗ ត្រូវ​ប្រើ​ប្រាស់​សម្រាប់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់​អនុវត្ត​តួនាទី និង​​ភារកិច្ច​របស់​ខ្លួន​នៅ​ឆ្នាំ​បន្ទាប់​។

ប្រភព​៖

- ការអនុវត្ត​មុខងារ​របស់​គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់

- THE FUNCTIONING OF COMMUNE COMITTEE FOR WOMEN AND CHILDREN

 

តួនាទី និង​ភារកិច្ច​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ខែសីហា 11, 2009

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 6:51 ល្ងាច

គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់​មាន​តួ​នាទី​និង​ភារកិច្ច​ដូច​ខាង​ក្រោម​នេះ​៖

  • រៀបចំ​ផែនការ​សកម្មភាព និង​ថវិកា​ប្រចាំ​ឆ្នាំ​របស់​គណៈកម្មាធិការ​ដាក់​ជូន​ក្រុម​ប្រឹក្សា​ឃុំ សង្កាត់​អនុម័ត​។
  • ផ្តល់​ប្រឹក្សា​យោបល់ និង​ជួយ​ក្រុម​ប្រឹក្សា​ឃុំ សង្កាត់ និង​មេឃុំ ចៅ​សង្កាត់ ចំពោះ​ការងារ​ពាក់ព័ន្ធ​សិទ្ធិ​នារី និង​កុមារ​នៅ​ឃុំ​ សង្កាត់​។
  • អប់រំ​ផ្សព្វផ្សាយ​ដល់​ប្រជាពលរដ្ឋ​ឲ្យ​បាន​យល់​ដឹង​អំពី​ច្បាប់ គោល​នយោបាយ​នានា​របស់​រដ្ឋ​ពាក់ព័ន្ធ​សិទ្ធិ​នារី និង​កុមារ​នៅ​ឃុំ សង្កាត់ និង​បំផុស​ចលនា​សហគមន៍​លើ​វិស័យ​សុខភាព អប់​រំ កិច្ចការពារ និង​ការអភិវឌ្ឍ​កុមារ ព្រម​ទាំង​ការចុះ​បញ្ជី​អត្រានុកូលដ្ឋាន​ជូន​ទារក និង​កុមារ​។
  • ទាក់ទាញ​ការគាំទ្រ ដើម្បី​ឲ្យ​នារី​បាន​ចូល​រួម​ធ្វើ​សេចក្តី​សម្រេច​លើ​ការអភិវឌ្ឍ​នៅ​មូលដ្ឋាន​ឃុំ សង្កាត់​។
  • បង្កើន និង​ពង្រឹង​នូវ​ការប្រាស្រ័យ​ទាក់ទង​កិច្ច​សហាការ និង​ការសម្របសម្រួល​រវាង​ក្រុម​ប្រឹក្សា​ឃុំ សង្កាត់ និង​អ្នក​ផ្តល់​សេវាកម្ម​ និង​អ្នក​ភូមិ​ដែល​ធ្វើ​សកម្មភាព​ជួយ​នារី និង​កុមារ​នៅ​ក្នុង​ឃុំ សង្កាត់​របស់​ខ្លួន​។
  • ជួយ​ក្រុម​ប្រឹក្សា​ឃុំ សង្កាត់ ក្នុង​ការប្រមូល​វិភាគ​ព័ត៌មាន ទិន្នន័យ​ពាក់ព័ន្ធ​នឹង​បញ្ហា និង​តម្រូវការ​របស់​នារី និង​កុមារ​ដើម្បី​ដាក់​បញ្ចូល​ក្នុង​ផែនការ​អភិវឌ្ឍន៍​ឃុំ សង្កាត់ និង​កម្មវិធី​វិនិយោគ​ឃុំ សង្កាត់​។
  • ចូល​រួម​អនុវត្ត ពិនិត្យ តាមដាន និង​វាយ​តម្លៃ​ផែនការ​សកម្មភាព​ឃុំ សង្កាត់​ពាក់ព័ន្ធ​ស្ថានភាព​នារី និង​កុមារ​។
  • តាមដាន​ស្ថានភាព​នារី និង​កុមារ​ក្នុង​ឃុំ សង្កាត់ និង​ធ្វើ​របាយការណ៍​ទៀងទាត់​ជូន​ក្រុម​ប្រឹក្សា​ឃុំ សង្កាត់ ព្រម​ទាំង​ដាក់​បញ្ចូល​ក្នុង​របាយការណ៍​ឃុំ សង្កាត់​។

មេឃុំ ចៅ​សង្កាត់​ដែល​ជា​ប្រធាន​គណៈកម្មាធិការ ត្រូវ​មាន​ការទទួល​ខុស​ត្រូវ​ចំពោះ​ក្រុម​ប្រឹក្សា​ឃុំ សង្កាត់​របស់​ខ្លួន​។ គណៈកម្មាធិការ​ត្រូវ​សម្រប​សម្រួល​ និង​សហការ​យ៉ាង​ជិតស្និទ្ធ​ជាមួយ​អ្នក​ផ្តល់​សេវាកម្ម​ផ្នែក​សង្គម​នានា អ្នក​ស្ម័គ្រ​ចិត្ត​ភូមិ និង​សហគមន៍​នៅ​ក្នុង​ឃុំ សង្កាត់ ដើម្បី​បំពេញ​តួនាទី​ភារកិច្ច​ខាង​លើ​ឲ្យ​មាន​ប្រសិទ្ធិភាព​។

ប្រធាន​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​មាន​តួនាទី​ និង​ភារកិច្ច​ដូច​ខាង​ក្រោម​​៖

  • ទទួល​ខុស​ត្រូវ​លើ​ការងារ​រួម​របស់​គណៈកម្មាធិការ ករណី​ប្រធាន​គណៈកម្មាធិការ​អវត្តមាន ត្រូវ​ផ្ទេរ​សិទ្ធិ​ជាលាយលក្ខណ៍​អក្សរ​ទៅ​អនុប្រធាន​ជា​អ្នក​ទទួល​ខុស​ត្រូវ​ជំនួស​។ បើ​អនុប្រធាន​អវត្តមាន ត្រូវ​ផ្ទេរ​ភារកិច្ច​បន្ត​ទៅ​ឲ្យ​សមាជិក​អចិន្ត្រៃយ៍​ជា​​អ្នក​ដឹក​នាំ​ការងារ​ជំនួស​
  • ជា​អធិបតី​រាល់​កិច្ច​ប្រជុំ​របស់​គណៈកម្មាធិការ​
  • អញ្ជើញ​សមាជិក​គណៈកម្មាធិការ ចូលរួម​ក្នុង​គ្រប់​កិច្ច​ប្រជុំ​ទៀងទាត់​របស់​គណៈកម្មាធិការ
  • ដឹកនាំ និង​ចូល​រួម​ជាមួយ​សមាជិក​គណៈកម្មាធិការ​ដើម្បី​អនុវត្ត​សកម្មភាព​នានា​របស់​គណៈកម្មាធិការ​នៅ​តាម​ភូមិ​នានា​។
  • កៀរគរ​ធនធាន​ពី​ប្រភព​នានា ដើម្បី​រៀបចំ​គម្រោង​នានា​ឆ្លើយតប​ទៅ​នឹង​តម្រូវការ​របស់​នារី និង​កុមារ​ដែល​បាន​លើក​ឡើង​ក្នុង​ផែនការ​អភិវឌ្ឍន៍​ឃុំ សង្កាត់ និង​កម្មវិធី​វិនិយោគ​ឃុំ សង្កាត់​
  • ធានា​ឲ្យ​មាន​ផែនការ​សកម្មភាព​និង​ថវិកា​របស់​គណៈកម្មាធិការ និង​ដាក់​បញ្ចូល​ផែនការ​សកម្មភាព និង​ថវិកា​នោះ​ទៅ​ក្នុង​ផែនការ​សកម្មភាព និង​ថវិកា​របស់​ឃុំ សង្កាត់។​
  • ទាក់ទាញ​ការគាំទ្រ និង​ជម្រុញ​ក្រុម​ប្រឹក្សា​ឃុំ សង្កាត់​ឲ្យ​វិភាជន៍​ថវិកា​វិនិយោគ​ឃុំ សង្កាត់ សម្រាប់​គាំទ្រ​គម្រោង​សេវាកម្ម​សង្គម​នៅ​ក្នុង​ឃុំ សង្កាត់​របស់​ខ្លួន​
  • ចលនា​ប្រជាពលរដ្ឋ​នៅ​ក្នុង​មូលដ្ឋាន ឲ្យ​ចុះ​បញ្ជី​អត្រានុកូលដ្ឋាន ពិសេស​ការចុះ​សៀវភៅ​អត្រានុកូលដ្ឋាន​កំណើត ពេល​មាន​ទារក​កើត​ឲ្យ​បាន​ទាន់ពេលវេលា​កំណត់​
  • គាំទ្រ​គំនិត​ផ្តួចផ្តើម​នានា​របស់​សមាជិក​គណៈកម្មាធិការ និង​លើក​ទឹកចិត្ត​ដល់​សមាជិក​គណៈកម្មាធិការ ដែល​មាន​ស្នាដៃ​ឆ្នើម​ក្នុង​ការបំពេញ​ការងារ​ពាក់ព័ន្ធ​នារី​ និង​កុមារ​
  • ធានា​ឲ្យ​មាន​របាយការណ៍​ទៀងទាត់ ស្តី​ពី​ការងារ​របស់​គណៈកម្មាធិការ​ជូន​ក្រុមប្រឹក្សា​ឃុំ សង្កាត់ ព្រម​ទាំងដាក់​បញ្ចូល​នូវ​របាយការណ៍​របស់​គណៈកម្មធិការ​នេះ​ទៅ​ក្នុង​របាយការណ៍​ឃុំ សង្កាត់​ផង​ដែរ​​។

អនុប្រធាន​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​មាន​តួនាទី​និង​ភារកិច្ច​ដូច​ខាង​ក្រោម​​៖

  • ជំនួស​ប្រធាន នៅ​ពេល​ប្រធាន​អវត្តមាន​
  • ចូលរួម​កិច្ចប្រជុំ​របស់​គណៈកម្មាធិការ
  • សហការ និង​គាំទ្រ​ដល់​សមាជិក​អចិន្ត្រៃយ៍ ដើម្បី​អនុវត្ត​ការងារ​ក្នុង​គោលដៅ​ធានា​នូវ​ប្រសិទ្ធិភាព​ការងារ​របស់​គណៈកម្មាធការ
  • បំពេញ​តួនាទី​ភារកិច្ច​បន្ថែម​តាមការប្រគល់​ឲ្យ​ពី​ប្រធាន​គណៈកម្មាធិការ​​។

សមាជិក​អចិន្ត្រៃយ៍​របស់​គណៈកម្មាធិការ​ទទួល​បន្ទុក​កិច្ចការ​នារី និង​កុមារ​មាន​តួនាទី និង​ភារកិច្ច​ដូច​ខាង​ក្រោម​​៖

  • រៀបចំ​សេចក្តី​ព្រាង​ផែនការ​សកម្មភាព និង​ថវិកា​ប្រចាំ​ឆ្នាំ​របស់​គណៈកម្មាធិការ
  • ពិនិត្យ តាមដាន​ការអនុវត្ត​ការងារ និង​រៀបចំ​របាយការណ៍​សកម្មភាព​របស់​គណៈកម្មាធិការ
  • រៀបចំ និង​ជួយ​ចាត់ចែង​ការប្រជុំ​ប្រចាំ​ខែ ឆមាស និង​ប្រចាំ​ឆ្នាំ​របស់​គណៈកម្មាធិការ
  • សហការ​ និង​សម្របសម្រួល​ជាមួយ​សមាជិក​គណៈកម្មាធិការ​នានា ដើម្បី​ធានា​នូវ​ការអនុវត្ត​សកម្មភាព​របស់​គណៈកម្មាធិការ​ឲ្យ​ទទួល​បាន​ជោគជ័យ
  • ចូលរួម​ប្រមូល​ព័ត៌មាន ទិន្នន័យ​ពាក់ព័ន្ធ​ស្ថានភាព​នារី និង​កុមារ​និង​ធ្វើការវិភាគ​ព័ត៌មាន ទិន្នន័យ​ពី​ស្ថានភាព​នារី និង​កុមារ​ក្នុង​ឃុំ សង្កាត់​របស់​ខ្លួន​ព្រម​ទាំង​ឯកសារ​ស្ថានភាព​ឃុំ សង្កាត់​ផង​ដែរ​
  • សម្របសម្រួល និង​ស្នើ​បញ្ចូល​តម្រូវការ​ដែល​ពាក់ព័ន្ធ​ស្ថានភាព​នារី និង​កុមារ​ទៅ​ក្នុង​ផែនការ​អភិវឌ្ឍន៍​ឃុំ សង្កាត់ និង​កម្មវិធី​វិនិយោគ​ឃុំ សង្កាត់
  • ពិនិត្យ​ តាមដាន និង​វាយ​តម្លៃ​ការងារ​អប់រំ​កុមារ​តូច​ៗ ជា​អាទិ៍​ការងារ​មត្តេយ្យ​សហគមន៍ និង​ការអប់រំ​ឪពុក​ម្តាយ
  • សហាការជាមួយ​សមាជិក​គណៈកម្មាធិាការ​នានា ជា​ពីសេស​មេភូមិ និង/ឬ​អនុប្រធាន​ភូមិ ដើម្បី​កៀរគរ​ឲ្យ​មាន​ការចូលរួម​ពី​អ្នក​ភូមិ ពិសេស​នារី និង​យុវជន យុវនារី នៅ​ក្នុង​ការអភិវឌ្ឍ​មូលដ្ឋាន​ឃុំ សង្កាត់ និង​អភិបាល​កិច្ច​មូលដ្ឋាន
  • សហាការ និង​ជួយ​ស្មៀន​ឃុំ សង្កាត់​ ដើម្បី​រៀបចំ​ផែនការ និង​របាយការណ៍​ចំណាយ​ថវិកា​របស់​គណៈកម្មាធិការ​។ ការបំពេញ​តួនាទី និង​ភារកិច្ច​របស់​សមាជិក​អចិន្ត្រៃយ៍ នឹង​ជួយ​បំពេញ​បន្ថែម​ទោ​លើការបំពេញ​តួនាទី និង​ភារកិច្ច​របស់​អ្នក​ទទូល​បន្ទុក​កិច្ចការ​នារី និង​កុមារ​ឃុំ សង្កាត់​។

សមាជិក​គណៈកម្មាធិការ​ទទួល​បន្ទុក​កិច្ចនារី និង​កុមារ​មាន​តួនាទី​និង​ភារកិច្ច​ដូច​ខាង​​ក្រោម​៖

  • ចូលរួម​ពិនិត្យ ពិភាក្សា និង​អនុម័ត​លើ​សេចក្តី​ព្រាង​ផែនការ​សកម្មភាព និង​ផែនការ​ថវិកា​របស់​គណៈកម្មាធិការ និង​អនុវត្ត​ផែនការ​សកម្មភាព​ប្រចាំ​ឆ្នាំ ព្រម​ទាំងធ្វើ​សេចក្តី​រាយការណ៍​ស្តី​ពី​ការអនុវត្ត​ការងារ​តាម​វិស័យ​របស់​ខ្លួន​
  • ចូល​រួម​ប្រមូល​ព័ត៌មាន ទិន្នន័យ​ពាក់ព័ន្ធ​ស្ថានភាព​នារី និង​កុមារ និង​ធ្វើការ​វិភាគ​ព័ត៌មាន ទិន្នន័យ​ពី​ស្ថានភាព​នារី និង​កុមារ​ក្នុង​ឃុំ សង្កាត់​របស់​ខ្លួន ព្រមទាំង​ឯកសារ​ស្ថានភាព​ឃុំ សង្កាត់​ផង​ដែរ​
  • យក​ចិត្ត​ទុកដាក់​ទប់ស្កាត់ និង​អន្តរាគមន៍​ចំពោះ​ករណី​អំពើ​ហិង្សា​ក្នុង​គ្រួសារ ការរំលោភ​បំពាន ការជួញ​ដូរ​ផ្លូវភេទ ការកេងប្រវ័ញ្ច​ពលកម្ម​នារី និង​កុមារ​នៅ​ក្នុង​ឃុំ សង្កាត់
  • ចូល​រួម​កិច្ច​ប្រជុំ​នានា​របស់​គណៈកម្មាធិការ និង​ផ្តល់​ព័ត៌ាមាន​ទាក់ទង​នឹង​កិច្ច​ការពារ​កុមារ ការងារ​អប់រំ និង​សុខភាព​ពាក់ព័ន្ធ​ស្ថានភាព​នារី​ និង​កុមារ​ជូន​គណៈកម្មាធិការ​ជា​ទៀងទាត់
  • បំផុស និង​លើក​ទឹកចិត្ត​ប្រជាពលរដ្ឋ​ឲ្យ​ចូល​រួម​ក្នុង​សកម្មភាព​នានា​ ដើម្បី​ជួយ​នារី និង​កុមារ​នៅ​ក្នុង​មូលដ្ឋាន​ភូំមិ ឃុំ សង្កាត់​របស់​ខ្លួន​។

មេភូមិ ឬ​អនុប្រធាន​ភូមិ​ដែល​ជា​សមាជិក​គណៈកម្មាធិាការ​ទទួល​បន្ទុក​បន្ថែម​លើ​តួនាទី និង​ភារកិច្ច​ខាង​លើ ដូច​ខាងក្រោម​៖

  • ចូលរួម​ផ្តល់​យោបល់​ជូន​គណៈកម្មាធិាការ​អំពី​បញ្ហា​ប្រឈម​ ដែល​ពាក់ព័ន្ធ​នឹង​ស្ថានភាព​នារី និង​កុមារ​នៅ​ក្នុង​ភូមិ​របស់​ខ្លួន
  • ធានា​ផ្តល់​ព័ត៌ាមានានា​ដែល​ពាក់ព័ន្ធ​នឹង​ភូមិ​របស់​ខ្លួន​ជូន​ប្រជាពលរដ្ឋ​តាម​ការណែនាំ​របស់​គណៈកម្មាធិការ​ និង​ក្រុម​ប្រេក្សា​ឃុំ សង្កាត់
  • ពិនិត្យ​ តាមដាន​ស្ថានភាព​នារី និង​កុមារ​នៅ​ក្នុង​ភូមិ និង​រាយការណ៍​ជា​ទៀងទាត់​ជូន​គណៈកម្មាធិការ​។

ស្មៀន​ឃុំ សង្កាត់​បន្ថែម​លើ​តួនាទី និង​ភារកិច្ច​ខាង​លើ មាន​ភារកិច្ច​ជួយ​ប្រធាន​គណៈកម្មាធិការ ដើម្បី​រៀបចំ​ផែនការ និង​របាយការណ៍​ហិរញ្ញ​វត្ថុ​របស់​គណៈកម្មាធិការ ដើម្បី​រៀបចំ​ផែនការ​ និង​របាយការណ៍​សកម្មភាព​របស់​គណៈកម្មាធិការ​ទៅ​ក្នុង​របាយការណ៍​ឃុំ សង្កាត់​។

ប្រភព​៖

- ការអនុវត្ត​មុខងារ​របស់​គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់

- THE FUNCTIONING OF COMMUNE COMITTEE FOR WOMEN AND CHILDREN

 

គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 5:17 ល្ងាច

គណៈកម្មាធិការ​ទទួល​បន្ទុក​កិច្ចការ​នារី និង​កុមារ​ឃុំ សង្កាត់ ត្រូវ​មាន​សមាសភាព​ដូច​ខាង​ក្រោម​៖

  • មេឃុំ ចៅ​សង្កាត់

ជា​ប្រធាន

  • ជំទប់​ទី ២ ចៅ​សង្កាត់​រង​ទី ២

ជា​អនុប្រធាន

  • អ្នក​ទទួល​បន្ទុក​កិច្ចការ​នារី និង​កុមារ​ឃុំ សង្កាត់

ជា​សមាជិក​អចិន្ត្រៃយ៍

  • ស្មៀន​ឃុំ សង្កាត់

ជា​សមាជិក

  • នាយ​ ឬ​នាយ​រង​ប៉ុស្តិ​នគរបាល​រដ្ឋបាល​ឃុំ សង្កាត់ ១ រូប

ជា​សមាជិក

  • នាយក​សាលា ឬ​តំណាង ១ រូប

ជា​សមាជិក

  • ប្រធាន​មណ្ឌល​សុខភាព ឬ​តំណាង​ ១ រូប

ជា​សមាជិក

  • មេ​ភូមិ ឬ​អនុប្រធាន​ភូមិ ១ រូប​​គ្រប់​ភូមិ

ជា​សមាជិក


សមាជិក​គណៈកម្មាធិការ​នេះ អាច​មាន​ការប្រែប្រួល​ដោយ​យោង​ទៅ​តាម​​ចំនួន​ភូមិ​ក្នុង​ឃុំ សង្កាត់​និមួយ​ៗ​។

ដើម្បី​លើក​កម្ពស់​ដល់​ការចូលរួម​របស់​ស្រ្តី គណៈកម្មាធិការ​នេះ​ត្រូវ​មាន​សមាជិក​ជា​នារី​យ៉ាង​តិច ៤០% នៃ​សមាជិក​ទាំងអស់​។

ករណី​មេឃុំ ចៅ​សង្កាត់​ ឬ​ជំទប់​ទី ២ ចៅ​សង្កាត់​រង​ទី ២ ជា​នារី និង​ជា​អ្នក​ទទួល​បន្ទុក​កិច្ចការ​នារី​និង​កុមារ​ឃុំ សង្កាត់ ត្រូវ​ជ្រើសរើស​សមាជិក​ម្នាក់​ក្នុង​ចំណោម​សមាជិក​ក្រុម​ប្រឹក្សា​ឃុំ សង្កាត់​ដែល​មាន​សមត្ថភាព ធ្វើ​ជា​សមាជិក​អចិន្ត្រៃយ៍​នៃ គណៈកម្មាធិការ​។

ប្រភព​៖

- ការអនុវត្ត​មុខងារ​របស់​គណៈកម្មាធិការ​ទទួល​បន្ទុក​កិច្ចាការ​នារី និង​កុមារ​ឃុំ សង្កាត់

- THE FUNCTIONING OF COMMUNE COMITTEE FOR WOMEN AND CHILDREN

 

តួ​នាទី និង​ភារកិច្ច​ជំនួយការ​មេ​ភូមិ ខែសីហា 10, 2009

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 11:45 ព្រឹក

ជំនួយការ​មេ​ភូមិ មាន​តួ​នាទី​ និង​ភារកិច្ច​ដូច​ខាង​ក្រោម​នេះ​៖

  • អនុប្រធាន​ភូមិ ទទួល​ជំនួស​មេ​ភូមិ ក្នុង​ពេល​ដែល​មេ​ភូមិ​អវត្តមាន ដោយ​មាន​មូលហេតុ​ច្បាស់​លាស់ ដូច​ជា​ មាន​ជម្ងឺ ឬ​មាន​បេសកកម្ម​ចេញ​ក្រៅ​ឃុំ សង្កាត់​របស់​ខ្លួន លើស​ពី ១ ថ្ងៃ​។ ក្រៅ​ពី​នេះ អនុប្រធាន​ភូមិ ត្រូវ​ទទួល​ជួយ​មេ​ភូមិ​លើ​ការអនុវត្ត​គម្រោង​អភិវឌ្ឍន៍​នានា​ក្នុង​ភូមិ តាម​គម្រោង​ផែនការ​របស់​ឃុំ សង្កាត់
  • សមាជិក​ភូមិ ទទួល​ជួយ​ធ្វើ​ជា​លេខាធិការ​ឲ្យ​មេ​ភូមិ និង​ទទួល​ជួយ​មេភូមិ​លើ​ការងារ​ស្ថិតិ ការចុះ​បញ្ជី​ប្រជាពលរដ្ឋ និង​ការរក្សា​ទុក​ឯកសារ​នានា​របស់​ភូមិ​។

ក្រៅ​ពី​ការងារ​ខាង​លើ​នេះ មេ​ភូមិ​អាច​ធ្វើការ​បែងចែក ប្រគល់​ភារកិច្ច​ដល់​អនុប្រធាន​ភូមិ និង​សមាជិក​ភូមិ​តាម​ការចាំបាច់ និង​​ធ្វើ​សេចក្តី​រាយការណ៍​ជូន​មេឃុំ ចៅ​សង្កាត់​សាមី​។

មេ​ភូមិ អនុប្រធាន​ភូមិ​ និង​សមាជិក​ភូមិ​ត្រូវ​៖

  • ជូប​ប្រជុំ​គ្នា​យ៉ាង​តិច មួយ​ដង​ក្នុង​មួយ​ខែ
  • ធ្វើការ​ពិគ្រោះ​យោបល់​ឲ្យ​បាន​ទៀងទាត់ ជា​មួយ​ប្រជាពលរដ្ឋ​ក្នុង​ភូមិ​របស់​ខ្លួន​។
  • មាន​វត្តមាន​នៅ​ទី​កន្លែង​ដែល​បាន​កំណត់ ដើម្បី​ជួប​ប្រជាពលរដ្ឋ​។

ក្រៅ​ពី​ការជួប​ប្រាស្រ័យ​ជា​ទៀងទាត់ ជា​មួយ​ប្រជាពលរដ្ឋ​របស់​ខ្លួន​នៅ​ទី​កន្លែង​ដែល​បាន​កំណត់ មេ​ភូមិ អនុប្រធាន​ភូមិ និង​សមាជិក​ភូមិ អាច​នឹង​ជួប​ប្រាស្រ័យ​ផ្ទាល់​ជាមួយ​ប្រជាពលរដ្ឋ​ក្នុង​ភូមិ​របស់​ខ្លួន​ជា​ប្រចាំ​តាម​ការចាំបាច់​។

ក្រុម​ប្រឹក្សា​ឃុំ សង្កាត់​ត្រូវ​ពិភាក្សា​ជា​មួយ​មេ​ភូមិ ដើម្បី​រៀប​ចំ​ឲ្យ​មាន​ទី​កន្លែង សម្រាប់​មេ​ភូមិ​ជួប​ប្រាស្រ័យ​ជាមួយ​មជ្ឍដ្ឋនានា​តាម​ភូមិ​នីមួយ​ៗ​។

ទី​កន្លែង​ធ្វើការងារ​នេះ អាច​ជា​ទីស្នាក់ការ​ភូមិ ចំពោះ​ភូមិ​ដែល​មាន​ទី​ស្នាក់ការ​។ ចំពោះ​ភូមិ​ដែល​គ្មាន​ទី​ស្នាក់ការ ត្រូវ​ពិភាក្សា​គ្នា ដើម្បី​រក​ទី​កន្លែង​សម​ស្រប​ណា​មួយ​ ដែល​អាច​ជា​៖

  • សាលារៀន
  • វត្តអារាម
  • វិហារ​សាសនា
  • អគារ​សាធារណៈ ឬ
  • គេហដ្ឋាន​ផ្ទាល់​របស់​មេ​ភូមិ​។

ការជ្រើសរើស​យក​ទី​កន្លែង​ណា​មួយ ត្រូវ​មាន​ការពិគ្រោះ​ពិភាក្សា​ឲ្យ​ឯកភាព​គ្នា​ពី​ក្រុមប្រឹក្សា​ឃុំ សង្កាត់ មេ​ភូមិ អនុប្រធាន​ភូមិ និង​សមាជិក​ភូមិ ហើយ​ត្រូវ​មាន​ការយល់​ព្រម​ជាមុន​ពី​ម្ចាស់​ទី​កន្លែង​ទាំង​នោះ​។

មេ​ភូមិ និង​ក្រុម​ប្រឹក្សា​ឃុំ សង្កាត់ ត្រូវ​ផ្សព្វផ្សាយ​អំពី​ទី​កន្លែង​ធ្វើ​ការងារ​នោះ​ដល់​សាធារណជន​។

ទី​កន្លែង​ធ្វើការងារ​របស់​ភូមិ ត្រូវ​បើក​ទទួល​ប្រជាពលរដ្ឋ​យ៉ាង​ហោច​ណាស់​មួយ​ថ្ងៃ ក្នុង​មួយ​សប្តាហ៍​។

ប្រភព​៖
- ការជ្រើសរើស​មេ​ភូមិ​ និង​ជំនួយការ​មេភូមិ

 

តួនាទី និង​ភារកិច្ច​មេ​​ភូមិ

Filed under: ប្រព័ន្ធ​រដ្ឋបាល​មូលដ្ឋាន — vuthdevelop @ 10:13 ព្រឹក

ភូមិ​គឺ​ជា​កន្លែង​ប្រមូល​ផ្តុំ​ដោយ​ផ្ទះ និង​គ្រួសារ​ប្រជាពលរដ្ឋ​ជា​ច្រើន​។ ភូមិ​ជា​ច្រើន​រួម​ផ្តុំ​គ្នា​បង្កើត​បាន​ជា​ឃុំ ឬ​សង្កាត់​មួយ​។ ភូមិ​មិនមែន​ជា​ថ្នាក់​រដ្ឋបាល​ដែល​បាន​ចែង​នៅ​ក្នុង​រដ្ឋធម្មនុញ្ញ​ឡើយ​។ ភូមិ​និមួយ​ៗ​ត្រូវ​គ្រប់គ្រង​ដោយ​មេភូមិ​ម្នាក់ អម​ដោយ​អនុប្រធាន​ភូមិ​ម្នាក់ និង​សមាជិក​ភូមិ​ម្នាក់​ជា​ជំនួយការ​។ មេភូមិ​មាន​តួនាទី និង​ភារកិច្ច​ដូច​ខាង​ក្រោម​៖

  • ទទួល​ខុស​ត្រូវ​រួម​ក្នុង​ភូមិ​របស់​ខ្លួន
  • ជាតំណាង​ឲ្យ​ប្រជាពលរដ្ឋ​ទាំងអស់​នៅ​ក្នុង​ភូមិ​ និង​ជា​ខ្សែ​រយៈ​ចម្បង​សម្រាប់​តភ្ជាប់​ទំនាក់ទំនង​រវាង​ភូមិ និង​ក្រុមប្រឹក្សា​ឃុំ សង្កាត់
  • បង្កើន​ការពិគ្រោះ​យោបល់ ទទួល​ការណែនាំ និង​ធ្វើ​កិច្ចសហ​ប្រតិបត្តិការ​ជាមួយ​ក្រុមប្រឹក្សា​ឃុំ សង្កាត់​​របស់​ខ្លួន​
  • ចូល​រួម​ក្នុង​កិច្ច​ប្រជុំ​គណៈ​កម្មាធិការ​នានា​របស់​ឃុំ សង្កាត់ នៅ​ពេល​ដែល​ក្រុមប្រឹក្សា​ឃុំ សង្កាត់​តម្រូវ ដើម្បី​ផ្តល់​យោបល់​អំពី​កិច្ចការ​ដែល​ពាក់ព័ន្ធ​ក្នុង​ភូមិ​របស់​ខ្លួន​​ មាន​ជា​អាទិ៍​៖

    - ផ្តល់​យោបល់​ដល់​គណៈកម្មាធិការ​ភូមិ អំពី​របៀប​បង្កើន និង​កសាង​សមត្ថភាព និង​ធនធាន​របស់​ភូមិ​
    - ផ្តល់​យោបល់​ដល់​គណៈកម្មាធិការ​កិច្ចការ​ភូមិ អំពី​របៀប​បង្កើន និង​កសាង​សម្ថភាព និង​ធនធាន​របស់​ភូមិ
    - ផ្តល់​យោបល់​ដល់​គណៈកម្មាធិការ​កសាង​ផែនការ និង​ថវិកា​ឃុំ សង្កាត់​អំពី​៖

    + តម្រូវការ និង​អាទិភាព​របស់​ភូមិ ដើម្បី​បញ្ចូល​ក្នុង​ផែនការ​អភិវឌ្ឍន៍​ឃុំ សង្កាត់​
    + ការអនុវត្ត​ផែនការ​អភិវឌ្ឍន៍​ឃុំ សង្កាត់​ក្នុង​ភូមិ​របស់​ខ្លួន
    + ការត្រួត​ពិនិត្យ និង​វាយ​តម្លៃ​ការអនុវត្ត​ផែនការ​អភិវឌ្ឍន៍​ឃុំ សង្កាត់​ក្នុង​ភូមិ​របស់​ខ្លួន​
  • ត្រូវ​ធ្វើ​សេចក្តី​រាយការណ៍​រាល់​បញ្ហា​ដែល​ពាក់ព័ន្ធ​និង​ភូមិ​របស់​ខ្លួន ដើម្បី​ដាក់​បញ្ចូល​ក្នុង​​របាយការណ៍​ប្រចាំ​ឆ្នាំ របស់​ក្រុមប្រឹក្សា​ឃុំ សង្កាត់
  • ត្រូវ​ចូល​រួម​កិច្ច​ប្រជុំ​របស់​ក្រុមប្រឹក្សា​ឃុំ សង្កាត់ ក្នុង​ករណី​មាន​សំណូម​ពរ​ពី​ក្រុម​ប្រឹក្សា​ឃុំ សង្កាត់
  • ត្រូវ​ធានា​ផ្តល់​ព័ត៌មាន​ជា​ឯកសារ​ជា​សាធារណៈ ដែល​ពាក់ព័ន្ធ​នឹង​ភូមិ​របស់​ខ្លួន ជូន​ដល់​ប្រជាពលរដ្ឋ​របស់​ខ្លួន​។ ឯកសារ​ព័ត៌មាន​ទាំង​នោះ​អាច​រួម​មាន ព័ត៌មាន​ស្តី​ពី​ការប្រជុំ​របស់​ក្រុមប្រឹក្សា​ឃុំ សង្កាត់​​ ផែនការ​អភិវឌ្ឍន៍​ និង​ថវិកា​ឃុំ សង្កាត់​
  • ត្រូវ​ទទូល​ខុស​ត្រូវ​អនុវត្ត​កិច្ចការ​ដែល​បាន​ប្រគល់​ឲ្យ​ដោយ​ក្រុម​ប្រឹក្សា​ឃុំ សង្កាត់​របស់​ខ្លួន​

មេ​ភូមិ​មិន​អាច​មាន​សិទ្ធិ​អំណាច​ចុះ​ហត្ថលេខា​លើ​កិច្ច​សន្យា ឬ​ការផ្ទេ​អំណាច ឬ​ការចាត់ចែង​ដទៃ​ទៀត​ក្នុង​នាម​ភូមិ​បាន​ឡើយ​។

មេ​ភូមិ​ ពុំ​មាន​សិទ្ធិ​អំណាច​សម្រេច​បញ្ហា​ណា​មួយ​ដែល​ស្ថិត​ក្នុង​សមត្ថកិច្ច​របស់​ក្រុមប្រឹក្សា​ឃុំ សង្កាត់ ដោយ​គ្មាន​ការផ្ទេរ​អំណាច​ពី​ក្រុម​ប្រឹក្សា​ឃុំ សង្កាត់​ ស្រប​តាម​ប្រកាស​របស់​ក្រសួង​មហាផ្ទៃ ដែល​បាន​អនុម័ត​យល់​ព្រម​ដោយ​គណៈកម្មាធិការ​ជាតិ​គាំទ្រ​ឃុំ សង្កាត់​បាន​ឡើយ​។

ក្រុម​ប្រឹក្សា​ឃុំ សង្កាត់​មិន​អាច​ផ្ទេរ​អំណាច​ដល់​បុគ្គល​ ឬ​គណៈកម្មាធិការ ឬ​អង្គការ​ណា​មួយ​ នៅ​ក្នុង​ភូមិ​បាន​ឡើយ លើក​លែងតែ​មាន​ការអនុញ្ញត​ដែល​បាន​ចែង​ក្នុង​ប្រកាស​របស់​ក្រសួង​មហាផ្ទៃ ដែល​បាន​អនុម័ត​យល់ព្រម​ដោយ​គណៈកម្មាធិការ​ជាតិ​គាំទ្រ​ឃុំ សង្កាត់​។

ប្រភព​៖
- ការជ្រើសរើស​មេ​ភូមិ​ និង​ជំនួយការ​មេភូមិ

 

 
តាមដាន

Get every new post delivered to your Inbox.